ലോകമെങ്ങും സാമൂഹികാംഗീകാരം നേടിയെടുത്ത സ്ഥാപനമാണ് കുടുംബം. ഫ്ലൈറ്റ് സെന്റര് എന്ന മഹാപ്രസ്ഥാനത്തിന്റെ അടിത്തറ സുസ്ഥിരവും സുരക്ഷിതവുമായ കുടുംബവ്യവസ്ഥയാണ്. വീടുവിട്ടാല് മറ്റൊരു വീടായി കമ്പനി മാറുന്നു. ജീവനക്കാര്ക്ക് സ്വന്തം വീടിനോടുള്ള അതേ ആത്മബന്ധം സ്ഥാപനവുമായി ഇഴചേരുന്നു. ജീവനക്കാര് തമ്മിലുള്ള ബന്ധമാവട്ടെ തീര്ത്തും അനൗപചാരികം. ഔപചാരികതകളുടെ പരിവേഷം അഴിഞ്ഞുവീഴുന്നതോടുകൂടി അതൊരു ഹൃദയബന്ധമായിത്തീരുന്നു. തന്റേതായ തനതായൊരു നേതൃത്വം വഴി കമ്പനിയെ ലോകത്തിനുതന്നെ മാതൃകയാക്കുകയാണ് ഗ്രഹാം.
സാമൂഹിക മൂലധനമാണ് വാണിജ്യമൂലധനത്തിന്റെ പ്രധാന ഉറവിടമെന്ന് നാം പലപ്പോഴും ഓര്ക്കാറില്ല. വളരെ സാമ്പത്തികമായും സാംസ്കാരികമായും മുന്നേറിയ ഒരു സമൂഹത്തിന്റെ വിജയരഹസ്യം ട്രസ്റ്റ് ആണ് - അംഗങ്ങള് തമ്മിലുള്ള തകരാത്ത അഥവാ തകര്ക്കാനാവാത്ത വിശ്വാസം. അത്തരം സമൂഹത്തിന്റെ മറ്റൊരു പ്രത്യേകതയാണ് അഭിപ്രായവ്യത്യാസങ്ങളെ നിഷ്നപ്രഭമാക്കുന്ന അഭിപ്രായൈക്യത്തിന്റേതായ ഒരു ഉയര്ന്ന സംസ്കാരം.
വയോധികനും ജ്ഞാനിയുമായ പിതാവ് മരണാസന്നനായി കിടക്കുന്നു. മക്കള് ഈ അച്ഛന് തങ്ങള്ക്കായി ഒന്നും കരുതിവെച്ചില്ലല്ലോ എന്ന ദുഃഖത്താല് ചുറ്റിലുമിരിക്കുന്നു. എല്ലാവരുടെയും ദുഃഖത്തിന്റെ യഥാര്ഥ കാരണം പിടികിട്ടിയ അദ്ദേഹം അവരെ ഓരോരുത്തരെയായി അരികിലേക്ക് വിളിച്ചു. ഒരുണക്കക്കമ്പ് കൈയില് കൊടുത്തു, അത് കഷണങ്ങളാക്കി മുറിക്കാന് ആവശ്യപ്പെട്ടു. ക്ഷണനേരമാത്രയില് കിട്ടിയ വടി അവരുടെ കൈകളില് നുറുങ്ങി. അങ്ങനെ പൊട്ടിയ കഷണങ്ങളെടുത്ത് ഒന്നാക്കിക്കെട്ടി അദ്ദേഹം ഓരോരുത്തര്ക്കും തിരിച്ചുനല്കി. അത് വീണ്ടും പൊട്ടിക്കാന് ആവശ്യപ്പെട്ടു. ദുര്ബലമായ ഉണക്കചില്ലിക്കമ്പുകളായിരുന്നിട്ടും കൂട്ടംകൂടിനിന്നപ്പോള് അവയുടെ ശക്തിക്കുമുന്നില് അവരുടെ പേശീബലം തോറ്റു. ഐകമത്യം മഹാബലം എന്നൊരു അമൂല്യമായ ബോധം നിരാശരായ മക്കള്ക്ക് പകര്ന്നുനല്കിക്കൊണ്ട് ആ വയോധികന് വിടവാങ്ങി. ഐക്യവും പരസ്പരവിശ്വാസവുമുള്ള കുടുംബങ്ങളുടെയും സ്ഥാപനങ്ങളുടെയും പ്രസ്ഥാനങ്ങളുടെയും കരുത്ത് തകര്ക്കാനാവാത്തതാണ്.
രചന :- ദേബശിഷ് ചാറ്റര്ജി
കടപ്പാട് :- മാത്രുഭൂമി ദിനപത്രം